ՈՎՍԵ4
- 1Լսեցէք Տիրոջ խօսքը, ով Իսրայէլի որդիք, որ Տէրը վէճ ունի երկրի բնակիչների հետ, որովհետեւ ճշմարտութիւն չ’կայ, ողորմութիւն չ’կայ, եւ Աստուծոյ գիտութիւն չ’կայ երկրի մէջ։
- 2Երդնուլն ու ստելը եւ սպանելն ու գողանալն ու պոռնկանալը դուրս են թափուել. Եւ արիւնները արիւնների են հասնում։
- 3Դորա համար երկիրը սուգ պիտի անէ, եւ պիտի նուաղին նորա բոլոր բնակիչները դաշտի գազանների եւ երկնքի թռչունների հետ, եւ ծովի ձկերն էլ պիտի վերջանան։
- 4Սակայն թող մարդ չ’վիճէ, եւ մարդ չ’յանդիմանէ. Բայց քո ժողովուրդը քահանայի հետ վիճողների պէս է։
- 5Եւ դու կ’գլորուիս ցերեկը, եւ կ’գլորուի քեզ հետ մարգարէն էլ գիշերը, եւ պիտի բնաջինջ անեմ քո մօրը։
- 6Իմ ժողովուրդը բնաջինջ եղաւ գիտութիւն չ’լինելուն համար. Որովհետեւ դու մերժեցիր գիտութիւնը, ես էլ քեզ եմ մերժելու իմ քահանայութիւնիցը. Եւ դու մոռացար քո Աստուծոյ օրէնքը, ես էլ քո որդկանցն եմ մոռանալու։
- 7Որչափ որ բազմացան, այնչափ մեղանչեցին ինձ դէմ. նորանց փառքը ես անարգութեան պիտի փոխեմ։
- 8Նորանք ուտում են իմ ժողովրդի մեղքը, եւ սրտով ցանկանում են նորանց անօրէնութեանը։
- 9Եւ պիտի լինի ինչպէս ժողովրդին նոյնպէս էլ քահանային, եւ նորանց պիտի պատժեմ նորանց ճանապարհների համեմատ, եւ նորանց գործերը պիտի հատուցանեմ իրանց։
- 10Եւ նորանք կ’ուտեն ու չեն կշտանալ, կ’պոռնկանան ու չեն բազմանալ. Որովհետեւ թողել են Տիրոջը որ չ’հնազանդեն։
- 11Շնութիւնը, գինին եւ քաղցուն տանում են սիրտը։
- 12Իմ ժողովուրդը իր փայտին է հարցնում, եւ իր ցուպը պիտի իմացնէ նորան. Որովհետեւ պոռնկութեան հոգին խաբել է, եւ պոռնկացան իրանց Աստուծուն չ’հպատակելով։
- 13Սարերի գլուխներին զոհ են մատուցանում, եւ բլուրների վերայ ծխում կաղնիի, կաղամախի եւ բեւեկնիի տակ՝ ըստ որում հովանին սիրուն է. սորա համար ձեր աղջիկները պիտի պոռնկանան, եւ ձեր հարսերը շնութիւն անեն։
- 14Ես չեմ պատժել ձեր աղջիկներին նորանք պոռնկանալիս, եւ ձեր հարսներին՝ երբոր նորանք շնանան. Որովհետեւ սորանք պոռնիկների հետ բաժանուած են, եւ նուիրեալ բոզերի հետ զոհում են. Եւ ժողովուրդը, որ չէ հասկանում, կորչում է։
- 15Թէեւ դու պոռնկանաս, ով Իսրայէլ, Յուդան թող յանցաւոր չ’լինի. Եւ մի գնաք Գաղգաղա, եւ վեր մի ելնէք Բեթաւան, եւ երդում մի անէք՝ Կենդանի է Տէրը։
- 16Որովհետեւ ապստամբ երինջի պէս ապստամբել է Իսրայէլ. Հիմա նորանց պիտի արածեցնէ Տէրը գառերի պէս լայնարձակ տեղ։
- 17Եփրեմը կուռքերին է փակել. թող տուր դորան։
- 18Խոտորնակ է նորանց արբեցողութիւնը՝՝, շնութիւնով շնացել են, սիրով սիրահարուել են ամօթի նորա իշխանները։
- 19Քամին նորան փաթաթել է իր թեւերի մէջ եւ նորանք պիտի ամաչեն իրանց զոհերիցը։